من عز نومي صحيت وشفت.....في عيني دمع تهادى على جفني وانا غافي
سترت دمعي بكمي قبل يغريني .....وأخذت هذا الجسد من باقي لحافي
وسريت تايه ورى خطوات رجليني..... لا الوجه وجهي ولا أوصافي هي أوصافي
أمشي واقول لطريقي لاتوديني.....لعيون ناس تبي تدري عن الخافي
ماودي الناس تدري وش يبكيني....كرامة النفس ورث أبوي واسلافي
أمشي واحس الخناجر في شراييني.....والبرد يمشي وراي وينهش اطرافي
إلين ماأوحيت لي صوت يناديني.......صوت أعرفه مثل ماأجهل وش خلافي
قمت أتلفت وانادي....لاتخليني....ماغير ه هالصوت هذا صوته الدافي
تعال شف غيبتك كيف أثرت فيني.....تعال شفني وأنا أغرق عقب مجدافي
تعال خذني ورحبي من عناويني.......تعبت أعدي علي جمرك وانا حافي
تعال واقطف بصوتك زهرة سنيني......كل المواعيد عقبك شمعها طافي
تعال وازرع خصل شعرك بكفيني......بضمها لين أحس بليلك الظافي
تعال وشفيك خايف انت ناسيني...؟؟!........قطعت صوتي عليك وطال ميقافي
لكن أمانه ترى اللي فيني كافيني....إن رحت منك كذا مارحت متعافي
مادريت ان حبك عن الناس معميني....لكن بخاطري كلمتين إن قلتها كافي
أمانة الله عليك إن غبت عن عيني......لايكون قلبك مثل قلب الزمن جافي
مع كل دمعة تذكر رعشة يديني....ومع كل ضحكة تذكر قلبي الوافي
-----
عذبــ المشاعر